CEBU, Philippines – Niulbo na usab ang kagubot sa clearing operation sa mga sakop sa Solid Waste Management office sa dakbayan sa Mandaue aron hawanan sa mga payag nga gitukod pagbalik sa gipapahawa nga informal settlers diha sa Mahiga Creek sa Sitio Mahusay ug Sitio Mahayag sa Barangay Subangdaku.
Ang kagubot miresulta sa pagkasikop sa Secretary General sa Sanlakas nga si Atty. Aaron Pedrosa ug usa niini ka sakop dihang gibabagan niini ang mga polis pagdakop kang Jessica Zuñiga, 22, nga gipasanginlang mihamag ug mikawras sa nawong ni Police Officer 2 Jessie James Galo Jr.
Si Inspector Miguel Andesa nga maoy hepe sa kapolisan sa Presinto 2 nga maoy ground commander sa crowd control nga mga polis maoy mimando sa pagdakop kang Pedrosa uban ni Zuñiga.
Ang duha gidala ngadto sa Mandaue City Hospital ug gipaubos sa medical examination ingon man si PO2 Galo nga nagpatambal sa samad sa iyang nawong.
Matud pa ni Senior Police Officer 1 Michael Limalima nga tiwason na unta ang nasugdang clearing operation sa grupo ni Placido Jakosalem dihang gisugat sila og mga bato ug plastic nga dunay hugaw sa tawo. Si Carlo Ybañez sa Mandaue City Legal Office miingon nga obstruction of justice ang ilang ipasaka batok ni Pedrosa ug physical injury usab ang atubangang kaso ni Zuñiga karong buntag. – /EIM) (BANAT NEWS)