CEBU, Philippines - Sa prisohan mangalagkalag ang magtiayong suspek nga drug pusher human nasikop sa kapolisan pinasikad sa warrant of arrest sa Media Once, dakbayan sa Toledo kagahapon sayo sa buntag.
Giila ang mga dinakpan nga sila si Marcelo Traya alyas Seyo ug asawa niini nga si Delia, pulos 60-anyos nga nagpuyo sa nahisgutang dapit. Gipangulohan ni Police Inspector Jovito Labra ang pag-serve sa warrant of arrest kauban nila ni PO3 John Ricafort, PO2 Melchezideck Batomalaque, PO1 Readan Lara ug PO1 Johnryl Pili.
Nakuha gikan sa magtiayon ang duha ka medium size nga gituohang shabu ug usa ka medium size nga gibahig na sa gagmay nga pakete. Nakuha gikan sa suspek ang P800 sa lain-lain nga denominasyon nga gituohang kita sa gibaligya nga ilegal nga drugas.
Gitanggong na sa prisohan sa Toledo City Police Station ang mga dinakpan ug gikatakdang pasakaan og tukmang kaso. (Raymond Abarcas/GMR)(BANAT NEWS)