Wa mag-helmet nakuhaa’g mga bala, shabu

CEBU, Philippines – Gidakop sa checkpoint sa mga polis ang usa ka motorista gumikan sa wala pagsul-ob og helmet apan nasakpan nga may dala nga mga bala sa armas ug shabu. Ang nadakpan mao si Milgen Salugsogan, 26-anyos, lumad nga taga Negros Oriental ug kasamtangang nagpuyo sa barangay Tawason, dakbayan sa Mandaue.

Ang deputy chief sa   Presinto 6 sa Mandaue City Police Office (MCPO), Inspector Alexander Cortes, ang nangulo sa checkpoint alas 12 pasado sa udto niadtong Sabado sa dalan H. Abellana, Canduman.

Ang dinakpan nga si Salugsogan maoy usa sa nahiagi sa checkpoint ug gidakop tungod kay wala magsul-ob og helmet.

Matud ni PO1 Arvin Pelicio nga unang gipangayo nila ni Cortes kang Salugsogan ang lisensiya sa pagmaneho apan napakyas sa pagpresentar ug sa pag-abli sa U-box alang sa pagkuha sa reshistro maoy nadiskubrehan sa kapolisan ang napulo ka bala sa kalibre .45.

Si Pelicio miingon nga ang rehistro sa motorsiklo ni Salugsogan wala usab motakdo sa plate number nga natala sa gipresentar niini nga rehistro nga nakapatumaw sa katahap sa kapolisan ug nakaaghat kanila sa pagrikisa sa kalawasan ug miresulta sa pagkasakmit sa  tulo ka gagmay’ng paketeng shabu nga dala niini. -/GMR) (BANAT NEWS)

 

Show comments