CEBU, Philippines - Midangop sa Fuente Police Station ang usa ka Hapon human gikawatan sa duha ka bayot samtang nakig-inom sa iyang amigo sa usa ka convenience store sa dalan Juana Osmeña, Kamputhaw dakbayan sa Sugbo.
Giila ang langyaw nga si Kaname Ando, 25, kasamtangang nagpuyo sa usa ka Inn sa Fuente Osmeña samtang giila ang suspetsado nga si Sofia Sayuri, 21, nagpuyo sa barangay Tinago.
Base sa inisyal nga report nga samtang nag-inom si Ando uban sa iyang amigo, duha ka bayot ang miduol kanila.
Tungod sa pagtuo ni Ando nga mga babaye ang duha, dali kining nitanyag nga palingkuron.
Dihang naka-inom na ang biktima, ang duha ka bayot nakapahimulos og kuha sa cellphone ug kwarta nga mobalor sa P3,000 sa biktima.
Si Ando gidala ni Sayuri sa Fuente Police Station aron tabangan nga mabalik ang cellphone ubos sa kondisyon nga hatagan siya og kwarta.
Human mihatag ang biktima, wala na magpakita si Sayuri ug nasuta sa buhatan sa kapolisan nga kakunsabo kini sa suspetsado nga nakaikyas.Apan nadakpan si Sayuri sa kapolisan ug kasamtangan gitanggong aron pasakaan og tukmang kaso. (BANAT NEWS)