CEBU, Philippines - Gusto ni Cebu City Mayor Mike Rama nga maresolba na sa daling panahon ang problema sa Banilad-Talamban, usa ka council ang giumol aron matutokan ang maong problema.
Ang Ban-Tal Traffic Management Council (BTMC) gibuhat sa mayor gilangkoban sa mga barangay kapitan sa Banilad, Talamban, Kasambagan ug Luz. Duna say mga representante gikan sa IT Park ug City Traffic Office Management (CITOM). Gitudlo nga pangulo sa grupo mao si Bunny Pages nga usa ka negosyante sa Banilad.
Matud ni Pages nga problema gyud sa lugar ang kahagip-ot sa karsada, gusto niyang madungog ang sentimiyento sa mga apektadong sector sa maong dapit aron sila maoy magtinabangay pagpangita og solusyon.
Apan sa pagkakaron unahon una ang mga loading ug unloading bay sa maong dapit. Samtang padul-an ang mga U-Turn slots sa lugar sama sa U-Turn slot sa Cabancalan diin modagan pa og hapit duha ka kilometro gikan sa University of San Carlos-Talamban Campus.
Samtang si Atty. Raphael Christopher Yap, sa CITOM misugyot nga pabutangan og pocket lanes sa piniling mga lugar ilabi na sa duol sa mga establisamento ug sa mga eskuylahan.(/EIM)(BANAT NEWS)