CEBU, Philippines - Ang Provincial Intelligence Branch mihimo karon ug inventory sa tanang AWOL (Absent Without Official Leave), dismissed ug suspendido nga mga pulis sa tibuok probinsiya sa Sugbo aron sa pagsuta kung usa kanila aduna bay kalambigitan sa ilegal nga buhat.
Kini tungod sa report nga adunay kapulisan nga nalambigit o protector sa ilegal nga drugas ug ilegal nga sugal. Si Superintendent Rodolfo Albotra, hepe sa PIB, mibutyag nga ilang tan-awon ang records sa kapulisan base sa Provincial Human Resource and Doctrine Development.
“Among tan-awon kung kinsa tong naa pa sa among area nga walay mga trabaho kay sagad sila maoy prone aning mga illegal activities,†matud ni Albotra kinsa midugang nga daghan kaayo ang mga pulis nga nalakip sa AWOL status.
Ang uban usab niini na-dismiss sa serbisyo tungod sa ilegal nga buhat. Matud niya nga adunay kanhi pulis (kinsa wala niya hinganli) nga anaa sa amihanang bahin Sugbo nga matud pa protector sa gidiling drugas.
Gani nasikop na nila kining maong pulis apan temporaryong nakagawas human makapiyansa sa kasong kalapasan sa Republic Act 9165 ug Republic Act 8294.
Bag-uhay lang ang Police Regional Office (PRO)-7 nakakita og rason sa pag-dismiss nila ni PO1 Jose Emmanuel Deluvio ug PO1 Caesar Montañez, kinsa nadestino sa Cebu Provincial Police Office, human nigawas nga guilty sila sa kasong grave misconduct human nagpositibo sila sa presensiya sa drugas. (BANAT NEWS)