CEBU, Philippines - Duha ang patay ug usa ang kritikal sa managlahing pagpamusil sa dakbayan sa Sugbo kagahapon sa kaadlawon ug sa milabay’ng gabii.
Pasado alas 6:30 sa gabii unang gipusil patay ang usa ka Ruel Repuya, 29, taga Sitio Cabangcalan II, Bulacao, Cebu City.
Sa imbestigasyon sa Homicide Section sa Cebu City Police Office nasayran nga migawas sa ilang panimalay ang biktima aron mopalit unta og pagkaon apan pag-abot sa nahitaboan dunay usa ka lalaki nga miduol kaniya ug diretsong mipusil tumong sa likod nga bahin sa iyang ulo.
Human sa pagpamusil dali gilayon nga midagan ang gunman sa wala masayri nga direksyon.Patay na kini pag-abot sa tambalanan.
Sa laing bahin, duna nay gisuspetsahan ang kapolisan kung si kinsa ang mipusil patay sa usa ka Gerwin Broncano-27, ug miangol sa kauban niini nga 15-anyos diha sa New Imus Road sa Barangay T. Padilla ning dakbayan sa miaging kaadlawon.
Matud pa ni SPO4 Alex Dacua, usa sa mga imbestigador sa Homicide Section sa CCPO duna na’y anggulo nga ilang gisubay apan dili pa una nila kini ikabutyag.
Nakuha sa kapulisan sa crime scene ang lima ka basiyo sa .9mm pistol ug 2 ka basiyo sa .45 kalibre. - /EIM (BANAT NEWS)