CEBU, Philippines - Giangkon sa Cebu Provincial Police Office nga kuwang sila sa kahimanan sa pagresponde sa mga baha ug landslides panahon sa ting-uwan.
Hinuon matud ni CPPO Director Noel Gillamac nga duna sila’y mga trained personnel alang sa search and rescue operations kung gikinahanglan.
Ang kapulisan nakig-alayon sa mga lokal nga kagamhanan sa pagpangandam ug paghimo og preemptive measures.
Isip front liners sa pagresponde sa mga katalagman, matud ni Gillamac nga maglisud sila sa pagtubag niini apan nanghinaut sila nga mahatagan usab ang kapulisan og kahimanan sa Kapitolyo.
Siya midugang nga ang mga lugar sa Midwestern Cebu lakip na ang mga dakbayan sa Toledo ug Naga ang gikonsiderar nga landslide prone areas base sa mga nahitabo kaniadto ilabi na kung kusog ang uwan samtang ang coastal areas sama sa Talisay City ug Minglanilla bahaonon usab.
Sayo ning semanaha, ang Philippine Atmospheric and Geophysical Services Administration mideklarar nga nagsugod na ang ting-uwan. (BANAT NEWS)