CEBU, Philippines - Walay pagtugot gikan sa pamunoan sa University of Southern Philippines Foundation (USP) ang gihimo nga team building sa coach sa football team sa maong unibersidad nga misangpot sa pagkalumos patay sa usa ka estudyante, didto sa Kabang Waterfalls, Sitio Bawgo, Barangay Budlaan, Cebu City.
Kini ang gibutyag ni Dr. Alicia Cabatingan ang Presidente sa USP nga nahinabi sa Banat News sa telepono.
Matud pa ni Cabatingan nga buntag sa adlaw nga Lunes, Hunyo 2 na sila nasayod nga dunay nalumos nga ilang estudyante sa gihimo nga team building ni coach Eleazar Toledo ug assistant coach Janard Fuentes, didto sa maong lugar.
“Wala g’yud mi kabalo sa ilang team building, bisan pending permit para sa ilang lakaw wala g’yud, they go with their own, miangkon ang ilang coach,†matud pa ni Cabatingan. Sa imbestigasyon sa Homicide Section sa Cebu City Police Office, gitug-an ni SPO4 Rey Cuyos nga usa ka Marjoe Villariza Edquila, 17, taga Banawa, Cebu City ang nalumos. Si Edquila lumad nga taga Carmen, Cagayan de Oro City, ug naka- enroll isip 1st year college sa kursong BS Business Management sa maong Unibersidad ang nalumos.
Misaka sa Kabang Waterfalls ang grupo uban ang ilang head coach ug assistant coach alang sa team building, apan samtang nagpahulay, nangaligo ang mga players, apan paglabay sa pipila ka minutos nahanaw na si Edquila, hapon na kining nakuha apan patay na.
Gipaubos na karon sa imbestigasyon sa USP disciplinary committee ang duha ka coaches. Tungod sa maong aksidente ang Cebu City Risk Reduction and Management Office (CCDRRMO) moinspeksyon sa maong dapit karong adlawa.
Matud ni Alvin Santillana, operations chief officer sa CCDRRMO napiit ang usa ka tiil ni Edquila sa bato hinungdan sa iyang pagkalumos. “Bisa’g asa it is very dangerous. They should have exercise safety precautions,†niingon si Santillana. Samtang si acting Mayor Edgardo Labella nagkanayon andam ang siyudad motabang sa biktima. (BANAT NEWS)