CEBU, Philippines - Dul-an na sa usa ka buwan human mibuto ang isyu sa Cebu Puericulture and Maternity House may labot sa giingong pagplaster sa baba sa usa ka masuso.
Ang amahan ni Baby Yohannes nga si Ryan Noval nipadayag nga di gyud siya moatras sa kaso nga ilang nasugdan batok sa maong tambalanan.
Gipaabot nga sa sunod semana ipasaka na ang kaso batok sa nahisgutang tambalanan.
Matud pa ni Noval nga ilang gihimo karon mao ang pag-awhag sa ubang mga reklamante sa pagduol kanila aron kahatagan og hustisya ang mga bata nga gibuhatan niini.
Gidugang niini nga ang mga affidavit sa mga reklamante importante kaayo alang na sa kalamboan sa kaso aron mahunong na ang maong binuhatan sa ospital.
Samtang nahinabi sa Banat News ang apohan sa bata nga giingong giplasteran usab ang baba nga si Lucresio Son diin iyang gitataw nga di siya mopasaka og kaso tungod kay wala silay kwarta apan andam siya moluwat og affidavit isip tabang sa kawsa ni Noval.
Gibutyag usab niya nga sama sa rason sa nurse sa nahitabo sa anak ni Noval, giingong gisabaan usab kini sa hilak sa iyang apo mao nga giplasteran ang baba niini.
“Akong gipangutana nganong gipapitlan man na ma’am? Ingon siya aron kuno dili magsige og hilak mao nga niingon ko kaluoy sa bata,†matud ni Son. (BANAT NEWS)