Inahan sa masuso nadakpan

CEBU, Philippines - Nadakpan na sa kapolisan ang inahan sa patay nga napulo pa ka buwang masuso nga gibilin niini sa backseat sa Tamaraw FX sa miaging adlaw diha sa Tres Borces Extension, Barangay Kasambagan ning dakbayan sa Sugbo.

Si SPO4 Alex Dacua ang imbestigador sa Homicide Section sa CCPO mibutyag nga duna sila’y igo nga basihan sa pagtanggong sa 32-anyos nga inahan sa patay nga bata.

Matud pa ni Dacua nga ang pagbiya niya sa patay nga anak ug wala niya pagdala niini sa labing duol nga tambalanan aron kini katambalan  mamahimo nang hinungdan nga kini dakpon.

Ang maong inahan nga nahinabi sa Banat News miangkon nga  iyang gibilin ang iyang anak sa likod sa maong sakyanan  kay naglibog na siya kung unsay angay buhaton. Matud niya nakatulog siya  samtang nagbantay niini ug wala niya mabantayi nga  hinayhinay na diay mitaliwan iyang anak samtang silang duha naghigda ug naggakos.

Si Dacua miingon nga ila na nga gikunsulta ang Department of Social Welfare and Development (DSWD) ang maong inahan aron ipaubos sa psychiatric examination. Nasayran ‘sab sa Banat News nga way trabaho ang maong babaye, wa sad kini bana ug anha na lang magkatulgan sa aseras kauban ang iyang anak. (BANAT NEWS)