Daghang bus gipadagan sa LTFRB

CEBU, Philippines -  Gitug-an ni Land Transportation Franchising and Regulatory Board (LTFRB-7) Regional Director Ahmed Cuizon nga gipadaganan nila og daghang bus ang rota paingon sa siyudad sa Toledo, lungsod sa Tuburan ug Pinamungajan kagahapon ug karong adlawa.

Kini aron pagtubag sa awhag ni Gobernador Hilario Davide III nga padaganan og daghang sakyanan ang mga dapit sa kasadpang bahin sa Sugbo.

Matud pa ni Cuizon nga base sa assessment sa gobernador niadtong nakalabay nga Pasko ug ang pagsugat sa Bag-ong Tuig, kulang kaayo ang nagdagan nga mga bus sa naasoy nga rota hinungdan nga ubay-ubay nga mga pasahero ang natanggong.

Pagsiguro nga dili na masoble pa ang maong sitwasyon, si Cuizon niingon nga ilang gidugangan og bus nga mobiyahe sa maong rota.

Kini pinaagi sa paghatag og special permit ngadto sa mga bus operators nga may igong bus nga makadagan paingon sa Toledo, Tuburan ug Pinamungajan.

Matud ni Cuizon nga mao usab kini ang mga rota nga ilang giisyo nga special permit ngadto sa 50 ka Ceres bus sa Vallacars Transit Inc. Ang LTFRB makahimo pag-isyu og special permit nga magtugot sa mga bus nga makabiyahe sa laing rota kun adunay panginahanglan og dugang sakyanan ang maong mga dapit.

Gitataw hinoon ni Cuizon nga ang maong mga bus nga nahatagan og special permit apilon gihapon sa inspection.

Nasayran nga ang LTFRB ug LTO-7 nagtambayayong sa pag-inspection sa mga bus gikan sa mga dokumento hangtud na sa mga prino, mga suga ug uban pang kahimanan sa sakyanan aron pagsiguro nga luwas ang mga pasahero sa ilang biyahe.  (BANAT NEWS)