Tigpalusot og peke nga kwarta nadakpan

CEBU, Philippines - Gidakop sa mga house detective  ang usa ka tawo nga mibayad og peke  nga kuwarta ngadto sa kahera sa Pacific Mall sa Barangay Ibabao-Estancia, dakbayan sa Mandaue alas 6 pasado ang takna sa miaging Sabado sa gabii.

Ang nadakpan mao si Romeo Raquel, 39, minyo nga taga dalan A. Lopez, Barangay Labangon, dakbayan sa Sugbo.

Si PO1 Jerome Lendio, sakop  sa Presinto 1 sa Mandaue City Police Office (MCPO), miingon nga si Raquel mibayad og tibuok P1,000 ngadto sa kahera sa gipalit niining sandal nga nagkantidad og P200.

Ang kahera nga nakamatikod nga peke ang kuwarta nga gibayad sa suspek dali nga nangayo’g panabang sa mga house detective nga abtik usab nga midakop ni Raquel ug mitugyan ngadto sa kapolisan.

Matud ni PO1 Lendio nga gawas sa peke nga usa ka P1,000 nga gibayad ni Raquel ngadto sa kahera, nasakmitan pa g’yud si Raquel og tulo ka laing peke nga P1,000 ug upat ka peke nga P500, ingon man usa ka peke nga P200.

Dugang ni PO1 Lendio nga nagdumili pagtug-an ang suspetsado kun diin gikan ang mga peke nga salapi nga papel de banko.

Ang paggamit og mini nga kwarta nga ipalit na og mga kinahanglanon kalapasan sa Artcile 168 sa Revised Penal Code.  (BANAT NEWS)

Show comments