CEBU, Philippines - Makasalmot g’yud ang Lumad Basakanon sa Aliwan Festival sa Manila nga maoy morepresentar sa dakbayan sa Sugbo atol sa kalihukan karong Abril 12 ngadto 14. Ang Cebu City Council kagahapon miaprobar sa P1.6 Milyon nga gahin aron gastohon sa mga 200 ka sakop sa Lumad Basakanon nga moapil sa indigay sa pasundayag. Ang Lumad Basakanon maoy first prize winner sa Free Interpretation category sa miaging Sinulog Grand Parade kaniadtong Enero. Nabutang na usab ang Lumad Basakanon sa Hall of Fame sa Aliwan Festival dihang nahimo kini nga Grand Champion sulod sa tulo ka sunod-sunod nga higayon.
Si Kapitan George Rama sa Barangay Basak-San Nicolas nga maoy nagpasiugda sa Lumad Basakanon malaumon nga makuha gihapon sa iyang grupo ang Grand Champion aron maghatag kini og dungog sa dakbayan sa Sugbo. (BANAT NEWS)