CEBU, Philippines - Ang Cebu City Council miawhag sa kadagkoan sa Metro Cebu Water District (MCWD) nga dili mopausbaw sa presyo sa ilang tubig hangtud nga mapahigayon ang public hearing sa konseho unya sa Mayo 7.
Si Konsehal Gerardo Carillo miduso og resolusyon nga nag-awhag sa pagpahigayon sa public hearing kabahin sa laraw sa MCWD nga pausbawan ang presyo sa ilang tubig. Mosaka og P2 mata’g metro kubiko ang balayrunon sa mga konsumidor sa tubig, ang usa ka cubic meter nga tubig katumbas kini sa lima ka baril kon usa ka libo ka litros.
Ang mga konsumidor sa tubig sa Metro Cebu magbayad lang og P13.60 matag cubic meter kun ang ilang konsumo dili molapas sa 10 cubic meters sa usa ka buwan. Magkamahal ang kantidad sa tubig kun magkadaku ang konsumo.
Ang kadagkoan sa MCWD mipasabot nga pausbawan nila ang presyo aron dili sila makasinati og alkanse tungod sa mahal nga kantidad sa tubig nga paliton nila gikan sa pribadong kompaniya nga mokuha og tubig gikan sa sapa sa lungsod sa Carmen. Ang pribado nga kompaniya mosuplay og tubig sa MCWD pinaagi sa pagkonektar sa ilang mga tubo sa tubig ngadto sa linya sa MCWD didto sa Compostela.
Matud ni Carillo nga kinahanglang paminawon usa sa MCWD ang sentimento sa katawhan. Ang MCWD miingon nga nakahimo na sila og public hearing kaniadtong 2005, apan si Carillo miingon nga dili na kadto madawat kay nahimo kadto siyam ka tuig na ang milabay. (BANAT NEWS)