CEBU, Philippines - Giawhag ni Lapu-Lapu City Mayor Paz Radaza ang grupo sa kababayen-an pagsuporta sa kampanya batok sa "cyber prostitution" pinaagi sa pag-monitor sa ilang lugar.
Atol sa gipahigayong “Fun Walk sa Women's Month Celebration 2014†uban sa liboan ka mga sakop sa Kababayen-an sa Opon Nagkahiusa alang sa Kalambuan (KONKA), si Radaza mipasabot sa dakong papel sa kababayen-an ug ginikanan sa pagsumpo sa cyber prostitution.
Gidasig niya sila nga mohatag og impormasyon ngadto sa kapolisan kun makabantay silang dunay silingan nilang nalambigit sa cyber pornography.
Samtang si Rep. Aileen Radaza namahayag nga seryoso siya sa gisang-at niyang balaudnon nga nagsugyot nga padak-an pa ang silot niadtong mamatud-ang nalambigit sa cyber pornography. Base sa tema karong tuiga " Kababaenhan sa Tul-id nga Dalan ug Panginabuhian Padulong sa Kalambuan" nga nagsentro kini sa mga kalihukan sa kababaenhan hangtod sa Marso 21.
Atol sa maong selebrasyon adunay mga nagkalainlaing matang sa livelihood nga itudlo ngadto sa mga kababayen-an nga buot molambo ang ilang panginabuhian. (/EIM)(BANAT NEWS)