CEBU, Philippines - Ang lainlaing kalihukan alang sa tinuig nga pista sa Mandaue gisugdan na.
Ang pagsugod sa kalihukan kaniadtong Sabado gitambongan sa tanang kapitan sa 27 ka barangay sa Mandaue.
Ang Mandaue magsaulog sa ilang pista matag Mayo 8 apan sa buwan sa Marso pa lang buksan na ang lainlaing kalihukan.
Si Mayor Jonas Cortes ug Bise Mayor Glenn Bercede uban sa mga sakop sa committee sa pista karong tuiga maoy nangulo sa kalihukan.
Lakip sa kalihukan mao ang pagpresentar ngadto sa publiko sa 12 ka opisyal nga mga kandidata sa Miss Mandaue, 2014 ug usab ang home project sa kagamhanan sa sitio Dunggoan, barangay Paknaan.
Nunot sa pagbukas sa tinuig nga kalihukan alang sa pangilin sa Mandaue, magsunod ang matag gabii nga kalihukan nga naglakip sa pagpili og Miss Mandaue Media Choice ug Miss Talents Night karong Marso 21.
Himoon usab ang presentation night sa Miss Gay ug Miss Mandaue unya sa Abril 12, Sotero Cabahug Day sa Abril 22 ug motorcade ug Mandaue Got Talent ug ABC Night sa Abril 28.
Pagasundan usab kini sa Senior Citizen’s Night sa Abril 29 ug Rosas Pandan ug Mandaue City College Night sa Abril 30.
Ang kalihukan nga magsugod sa unang adlaw sa Mayo naglakip sa Panagtagbo Festival sa Mayo 3 ug Coronation Night sa Miss Mandaue sa Mayo 7 ug Symphony of Fire kon Firework Display atol g’yud sa pista ni San Jose pagka Mayo 8. - /BDB (BANAT NEWS)