CEBU, Philippines - Imbestigahon sa kadagkoan sa Department of Education (DepEd) ang gikataho nga pagpangdagmal nga gihimo sa usa ka magtutudlo nga lalaki sa Basak Elementary School didto sa lungsod sa Badian ngadto sa napulo niya ka tinun-an niadtong miaging semana.
Si DepEd-7 Regional Director Carmelita Dulangon nagkanayon nga iya nang gimandoan si DepEd Provincial Schools Division Superintendent Arden Monisit nga mohimo dayon og imbestigasyon sa maestro nga papugngan lang usa nila ngalan samtang gihimo pa ang imbestigasyon.
Samtang ang ginikanan sa duha ka tinun-an nga giingong gidagmalan sa ilang maestro midangop na sa Kapitolyo ug nangayo’g tabang ni Bise Gobernador Agnes Magpale aron kahatagan og hustisya ang ilang mga anak.
Usa sa mga ginikanan miingon nga sila maglikay gani sa pagdagmal sa ilang mga anak apan kining mao nga magtutudlo mao na hinoon ang modagmal sa mga bata.
Sumala pa ni Dulangon nga dili modepensa ang iyang opisina ngadto sa magtutudlo kun mamatud-an nga nakahimo kini og kalapasan sa pag-abuso sa kabataan ug motabang pa gani siya sa mga ginikanan aron nga makapasaka og kaso ngadto sa Ombudsman.
Tungod niini, si Dulangon miawhag ngadto sa mga magtutudlo nga palapdan pa niini ang ilang pasensiya sa kabataan ug isumbong lamang kini sa mga ginikanan kun sila magpabadlong diha sa ilang klase.
"Ang ilang pagtudlo sa kabataan ubanan g’yud sa pagsabot kun duna may misbehavior nga dili unta mosangpot sa pagpanagmal. Naa may mga ginikanan, pahibaloon lang nila kun unsa may nahimo sa bata nga wala na mahasubay sa maayong pamatasan. Dili g’yud mahimo nga sila ang mo-punish sa mga bata ilabina kun mogamit og corporal punishment," sigon pa ni Dulangon.
Ang usa sa mga ginikanan sa bata nga midangop sa Kapitolyo misaysay nga ang iyang 12-anyos nga anak-lalaki nakaangkon g’yud og labod sa bukobuko agi sa gibunal nga alambre sa kuryente.
Matud pa sa ginikanan nga na-trauma pag-ayo ang iyang anak kay mahadlok na gani kini nga moadto sa eskwelahan aron sa pag-eskwela tungod sa kahadlok niini ngadto sa maestro nga maoy mibunal kaniya tungod lang sa ilang pagkiatkiat ug paghimo’g kasaba. Iyang gilauman nga tabangan sila sa Kapitolyo aron dili mawala ang kaikag sa ilang kabataan sa pagtungha. (BANAT NEWS)