CEBU, Philippines - Nakadawat na ang mga Board of Election Teller (BET) ug ang mga sakop sa Board of Canvasser (BOC) og tag P2 mil matag usa isip suhol sa ilang serbisyo sa election sa barangay sa dakbayan sa Mandaue sa miaging Oktubre 28, 2013. Si Atty. Ann Fleur Gujilde nga maoy Comelec election officer sa maong dakbayan nga nahinabi sa Banat News kagahapon nagkanayon nga may pipila kanila nga nakadawat og P1,000.
Kini tungod kay nag-agad man sa gidaghanon sa polling precinct nga ilang gi-cluster nga maoy ilang giserbisyohan.
Si Atty. Gujilde miingon nga ang Department of Education (DepEd) supervisor nga nagserbisyo sa miaging barangay election mao na lamang ang wala makadawat sa ilang honorarium.
Gipasabot niya nga iya na nga gihandos ang tanan nga mga dokumento ngadto sa ulohan nilang buhatan aron kagahinan og tukmang salapi alang sa ilang honorarium.
Gitataw niya nga ang nagsunodsunod nga nahitabong katalagman nga naglakip sa 7.2 magnitude nga linog ug bagyong Yolanda maoy usa sa mga hinungdan sa kalangay sa kuwarta. Kini tungod kay na-busy man ang kadagkoan sa ilang buhatan sa pagtubag sa panginahanglan sa ilang mga kauban nga nabiktima sa maong mga katalagman. (BANAT NEWS)