CEBU, Philippines - Tulo ka mga gidudahang drug dealers ang nadakpan sa mga sakop sa Philippine Drug Enforcement Agency (PDEA) VII sa nagsunod nga mga entrapment operations sa Cebu City tungod sa mga reklamo sa ilaha rang mga silingan.
Si PDEA VII Regional Director Lyndon Aspacio miila sa mga suspek nga mao sila si Ceasar Riveral y Zapanta alias Sardik, 29, residente sa Gil Tudtud St., Mabolo, Cebu City; Jeffrey Pocdol Jr. y Abella , 21, residente sa barangay Lorega, Cebu City; ug Michael Lim y Limbaga, 37, residente sa barangay Day-as, Cebu City.
Si Riveral maoy unang nadakpan sa buy-bust operation niadtong Oktubre 19, 2013. Ug nakuhaan kini og walo ka plastic sachets nga shabu ug ang buy-bust money.
Samtang si Pocdol Jr. nadakpan pagka-Oktubre 21, 2013 ug nakuhaan usab kini og 18 ka paketeng shabu nga mitimbang og 3.16 gramos ingon man ang buy-bust money.
Niadtong Oktubre 23, 2013 nadakpan usab si Lim. Siya nalakip sa PDEA Watch List of Drug Personalities, nasakmitan siya og kinse ka paketeng shabu ug buy-bust money.
Migawas sa laboratory examination nga pulos positibong shabu ang nasakmit nga mga ebidensya gikan kanila.
Silang tulo pulos karon natanggong sa karsel sa Cebu City Jail sa Barangay Kalunasan, Cebu City human napasakaan na og tagsatagsa ka mga kasong kalapasan sa Section 5 (Sale of Dangerous Drugs) ug Section 11 (Unlawful Possession of Dangerous Drugs), sa Article 2, Republic Act No. 9165 o “Comprehensive Dangerous Drugs Act of 2002.†(BANAT NEWS)