CEBU, Philippines - Gibati og kabalaka ang asawa ni Talisay City Councilor Dory Emit human sila sulnga sa ilang silingan.
Si Milagros Emit, 54, asawa ni Dory maoy mi-report ngadto sa kapolisan human dad-i og arnis stick kon ulisi ni Jerome De la Cerna, residente sa sitio Centro, barangay Pooc.
Giingong si De la Cerna puwerting sukoa nga nangita kang Dory Emit kinsa giingong may atraso kaniya.
Si Dory nga nahinabi sa Banat News kagahapon mipasangil nga si De la Cerna sakop sa kaatbang nila sa politika.
Niadtong milabay’ng eleksiyon sa barangay ang asawa ni Dory mikandidato isip kapitan sa ilang barangay apan napildi.
Wala na ibutyag ni Dory kung unsay nasuk-an kaniya ni De la Cerna.
Apan ang konsehal mibahad nga ipadakop niya sa mga polis ug pasakaan og kaso si De la Cerna kung mobalik pa kini og tunob sa ilang nataran sa ilang balay. (BANAT NEWS)