CEBU, Philippines - Higpit karon nga gipanid-an sa kapolisan sa Mandaue City Police Office (MCPO) ang mga kandidato sa umaabot nga barangay election nga nalambigit sa ilegal nga kalihokan sama sa masiao ug ilegal nga drugas.
Kini ang gipadayag ni Superintendent Crisaleo Tolentino, deputy director for operation sa Mandaue City Police Office (MCPO) nga nahinabi sa Banat News niadtong miaging adlaw.
Matud pa niya nga ilang gipanid-an ang mga masiao operator pinansers ug drug lords nga naglihok sa kabarangayan nga posibleng mopaluyo og kandidato sa barangay. Giangkon ni Tolentino nga duna gyu’y mga naglihok nga masiao sa kabarangayan tungod sa mga reports bahin sa kalihokan sa ilang mga coordinators.
Si Tolentino nangayo og panabang sa mga katawhan sa pagpadangat ngadto sa ilang buhatan kun aduna sila’y mapanid-ang nagpasiugda og ilegal nga kalihokan sama sa masiao, ilegal nga drugas ug uban pa. (BANAT NEWS)