Pickup midaro sa restaurant, usa patay

CEBU, Philippines - Usa ka sakyanan ang midaro sa usa ka restaurant, litsonan ingon man sa mga gi-parking nga mga sakyanan diin usa ka tawo ang namatay diha sa dalan A. del Rosario  sa barangay Guizo, dakbayan sa Mandaue alas 9 pasado ang takna sa miaging gabii.

Ang namatay mao si Joseph Rodrigo Genos, 31, nagpuyo sa maong dapit ug  ang Isuzu pick up nga sakyanan gimaneho usab ni George Anthony Lisondra, 23, taga barangay Humay-Humay sa barangay Pajo, dakbayan sa Lapulapu.

Si SPO1 Joel Catabas mibutyag nga nagdagan subay sa A. Del Rosario sa maong dakbayan ang pick up nga nagdala sa plate number KCX 434 nga gimaneho ni Lisondra paingon sa dakbayan sa  Sugbo.

Apan dihang nahidangat sa maong dapit kalit lang kining mipidpid sa daplin ang pickup ug nadasmagan si Genos nga niadtong tungora naglingkod sa daplin sa dalan ug wala makabantay sa kalit nga pagpidpid sa pickup padung kaniya.

Matud pa ni Catabas nga human mapunggit ang biktima nalahos ang pickup sa Nanay  Wengs  Restaurant ug nalahos pa gayod ngadto sa litsonan nga gipanag-iya ni Regie Rodrigo Saludo .

Ang pickup wala dayon mohunong sa pagdagan ug nalahos ngadto sa duha ka sakyanan nga nag-parking nga gipanag-iya sa Coca Cola Philippines ug sa usa ka Marilou Cerecon nga taga Medellin, Cebu nga pulos nakabaton og mga kadaut.

Ang biktima nga   nadasmagan  nga si Genos dali untang gidala sa Mandaue City Hospital apan gideklarar kini sa mga doktor sa maong tambalanan nga dead on arrival.

Si Lisondra nga gituohang nagduka nga nagmaneho sa iyang sakyanan dali nga gidakop sa kapolisan ug temporaryo karong gibalhog sa detention cell sa kapolisan ug tukmang kaso karong Lunes og  reckless imprudence resulting to homicide ug multiple property damages.

Gisubay pa karon kung hubog ba si Lisondra atol sa pagmaneho niini sa                 maong sakyanan maong nadisgrasya.

Sa laing aksidente sa kadalanan, patay ang usa ka 12-anyos nga batang lalaking ballot vendor human nadasmagan og sakyanan diha sa dalan M. C. Briones sa barangay Ibabao, dakbayan sa Mandaue alas- 8 pasado ang takna sa miaging gabii.

Ang namatay mao si Jayboy Arcillas Batiancila, taga barangay Tabok sa maong dakbayan samtang ang nakadasmag kaniya mao si Antonio Mendoza  Gamaller, 67, taga Poblacion Oriental sa lungsod sa Consolacion.

Si PO2 Martin Jay Dejito, imbestigador sa traffic division sa Mandaue City Police Office (MCPO) miingon nga nagdagan ang sakyanan nga gimaneho ni Gamaller gikan sa Consolacion paingon sa barangay Centro sa maong dakbayan.

Dihang nahidangat na  kini sa maong lugar ang biktima giingong milabang sa dalan hinungdan sa pagkadasmag kaniya ni Gamaller. Daling mihunong si Gamaller ug gidala sa Cortes General Hospital ang bata apan paglabay sa pipila ka oras giingong nakabsan kini sa kinabuhi.

Nasayran nga ang biktima giingong gigukod sa grupo sa mga rugby boy sa maong lugar maong midagan kini labang sa pikas habig sa dalan. (BANAT NEWS)