CEBU, Philippines - Migahin si Bokal Thadeo Ouano og premyo nga kawarta gikan sa iyang Legislative Assistance Fund alang sa duha ka taga dakbayan sa Mandaue nga nag-una sa mga mipasar sa June 2013 Nursing Licensure Examination.
P25 mil ang gigahin alang kang Beverly Anne Felicio Balagon sa Barangay Canduman ug P15 mil alang kang Mae Amor Naingue Desabille sa Barangay Cambaro, pulos sa dakbayan sa Mandaue.
Ang Hunta Probinsiyal niadtong Lunes nipasidungog sa duha ka malampusong nars pinaagi sa resolusyon nga giduso ni Ouano.
Si Balagon ang numero uno samtang ika-unom si Desabille sa nikuha sa maong pasulit. Gipahibawo sa Professional Regulations Commission niadtong Hulyo 8 ang resulta sa maong pasulit diin ang mikuha niini 37,887 apan 16,219 kon 42.81 porsiyento lang ang nipasar.
“Passing the board exam gives a feeling of euphoria and satisfaction, but unutterable and indescribable feeling is due to a board exam topnotcher,†matud pang Ouano.
Si Balagon, 20 anyos, gikan sa Velez College, nakakuha og 87 porsiyento.
Siya anak sa magtiayong Maria Victoria nga usa ka dermatologist ug Bambi Ceferino Balagon nga usa ka enhinyero.
Samtang si Desabille, nagtungha sa University of the Philippines - Manila, apan nagdaku kini sa Barangay Cambaro ug nakakuha og 85.60 porsiyento.
Gipadayag ni Ouano nga ang ganti ihatag aron madasig usab ang uban nga mosunod sa ilang lakang tumong sa pagkab-ot sa kalampusan ug makahatag og dungog sa mga Sugbuanon. (/WC) (BANAT NEWS)