CEBU, Philippines - Ang hepe sa Cebu City Police Office magbutang og duha ka pulis matag tunghaan sa pag-abli sa klase karong adlawa aron masiguro ang seguridad sa mga estudyante ingon man sa mga ginikanan.
Si Senior Supt. Mariano Natu-el, and acting director sa CCPO, nagkanayon usab nga manghatag sila og mga flyers bahin sa mga pamaagi aron malikay sa mga kriminal.
Si Natu-el nagkanayon na ang duha ka-pulis nga i-deploy sa matag tunghaan parte sa ilang police visibility ilabina nga base sa mga nanglabay’ng mga kasinatian, mosaka gyud ang krimen matag abli sa klase.
“Mo-increase g’yud ang petty crimes kay basta daghang tawo, mo-camouflage ang criminals. Paborito nila ni basta daghang tawo,†matud pang Natu-el. Iya na sad gitahasan ang mga station commanders ug mga hepe sa nagkalain-laing special units sa CCPO na mag-establisar sa ilang tagsa-tagsa ka-Police Action Centers aron kasampitan sa publiko.
Ang City Traffic Operations Management (CITOM) ang magpakatap usab og mga traffic enforcers tungod kay gipaabot nilang mohuot gyud ang trapiko.
“So priority nato tomorrow ang public schools. Sa June 10 pa man mangabli ang mga private schools,†pasabot pa ni Natu-el.
Si Natu-el mipahimangno usab sa mga estudyante nga magbantay sa ilang kaugalingon.
Samtang karong buntag, ang CCPO mangapud-apod unya og mga school supplies sa di muminos 500 ka mga bata sa Mabolo Elementary School.
Si Natu-el nagkanayon nga gawas sa donasyon, nag-amutay usab ang mga kapulisan sa CCPO para makapalit og mga notebook, crayons, writing pad ug lapis isip tabang sa mga bata. (BANAT NEWS)