CEBU, Philippines - Gi-withdraw kagahapon sa buntag atol sa ilang gipahigayong sesyon ni Konsehal Bernard Joseph Odilao, chairman sa committee on environment sa konseho sa siyudad ang iyahang ipalabang unta nga resolusyon kabahin sa privatization sa pagkolekta sa basura.
Ang maong resolusyon maghatag unta kini og pagtugot kang Mayor Socrates Fernandez nga mogama og kasabutan tali sa EVO ventures nga usa ka pribadong kompaniya nga naglambigit sa solid waste management ug pagkolekta sa mga basura.
Si Odilao mibutyag kagahapon sa mga tigbalita nga dunay mga ginagmay nga usbonon ilabi na sa kasabutan tali sa siyudad ug sa nahisgutang pribadong kompaniya hinungdan nga wala una niya padayona og palabang ang mao niyang resolusyon.
Hinuon matud ni Odilao nga subli niyang ipalabang ang mao niyang resolusyon sa dili pa ang Hunyo 30. Si Odilao kinsa last termer na karon ang masaligon nga maaprobahan ang nahisgutang resolusyon.
Apan si konsehal Romeo Villarante kinsa napiling bise mayor sa milabay’ng eleksiyon nagkanayon kini nga duna untay feasibility study nga ipresentar ug apud-aporan sila og kopya sa kasabutan una nila kini aprobahan.
Matud niya nga walay feasibility study, recommendation o uban pang mga rekisitos nga gipakita ngadto kanila si Odilao kabahin sa planong privatization sa pagkolekta sa basura.
Ang EVO ventures Inc. usa kini ka pribadong kompaniya nga nag-specialized sa solid waste management ug pagkolekta sa mga basura. (BANAT NEWS)