CEBU, Philippines - Sugdan na karong adlawa sa Commission on Elections ang pagtudlo sa 1,184 ka magtutudlo dinhi sa dakbayan nga mosilbi isip sakop sa Board of Election Inspectors (BEI) atul sa eleksyon karong Mayo 13 kun unsaon paggamit ang Precinct Count Optical System (PCOS). Matud ni Cebu City North District Election Officer Marchel Sarno nga anam-anamon nila pagpatambong ang maong mga magtutudlo posible tag 50 ka tawo sa usa ka higayon.
Human niini ipailawom sila sa eksaminasyon kabahin sa ilang nakat-onan bahin sa PCOS machines aron ang makapasar i-certify sa Department of Science and Technology (DOST) aron makasilbi isip sakop sa BEI.
Apan si Sarno miingon nga kun gamay ra ang makapasar, mahimo ra usab nga usa sa tulo ka sakop sa BEI ang makapasar.
Si Sarno mipasabot nga mahinungdanon kaayo nga dunay mga BEI nga maantigo kung unsaon pag-operate ang PCOS machines nga gamiton sa pag-ihap sa mga botos atul sa eleksyon aron maminosan ang problema atul sa eleksyon.
Dinhi sa dakbayan sa Sugbo adunay 592 ka clustered precincts nga nahimutang sa lainlaing kabarangayan.
Kadtong motambong sa tagduha ka adlaw nga seminar nga pasiugdahan sa Comelec hatagan og honorarium nga tag P1,600. (/EIM) (BANAT NEWS)