CEBU, Philippines - Unom ka traffic enforcers sa dakbayan sa Talisay ang gipasanginlang nangilkil sa mga drayber ug gipaubos sa imbestigasyon. Si Bise Mayor Alan Bucao kinsa maoy chairman sa City of Talisay-Traffic Operation Development Authority (CT-TODA) nagkanayon nga kung mapamatud-an nga nakalapas ang maong mga enforcers mataktak gyud kini sa ilang trabaho.
Labing menus nga silot nga mahimong mapahamtang kanila mao ang pagka-suspenso lang sa ilang trabaho.
Ang Talisay dunay sobra sa 50 ka mga enforcer nga mga job order sa kagamhanan sa siyudad.
Gibutyag usab ni Bucao nga niining ulahi lang duna siya’y nadawat nga report nga dunay duha ka mga enforcers nga giingong magdawatan og P5 gikan sa mga drayber sa PUJ sa matag trip.
Samtang ang laing usa giingong magdawatan og P8 gikan gihapon sa mga drayber sa PUJ sa matag trip.
Matud ni Bucao nga susihon pa niya kung ang maong duha ka mga enforcer lakip ba kini sa unom nga gipaubos sa imbestigasyon. Hinuon matud niya nga dunay posibilidad usab nga dunay mga motorista nga nangasuko sa mga enforcers tungod sa ka-estrikto sa pagtuman sa ilang trabaho.
Ang nahisgutang duha ka mga enforcer nga gireklamo diha sa iyang buhatan matud ni Bucao apan base sa iyang pagka-ila kanila mga maayo sila og performance.
Ang bise mayor mibutyag usab kini nga dunay giingong mga drayber nga mohatag gyud ngadto sa mga enforcer ug ibilin ang kwarta anha sa mga sidewalk vendors ug sundon usab kini og kuha sa enforcers. Gikataho usab nga dunay mga karenderiya nga naa daplin sa karsada mopakaon og libreng pamahaw sa mga enforcers aron dili sikopon ang mga sakyanan nga moparada diha atubangan sa ilang kan-anan.
Matud usab ni Bucao nga naghuwat lang siya sa resulta nga gipahigayon sa traffic board batok sa maong mga enforcers. (/EIM) (BANAT NEWS)