Pagpakabuang sa Customs
Haskang paita ni kanhi Customs Commissioner Nicanor Faeldon. Hangtud sa katapusang gutlo niya sa katungdanan, naglibog pa nganong napakyas paglimpiyo sa usa sa labing kawatan nga buhatan sa gobiyerno. Natangtang na lang sa puwesto, wa pa g’yuy klarong ideya unsaon pagtuman sa iyang trabaho.
Nipaubos hinuon si Faeldon sa iyang kaugalingon pinaagi sa pag-angkon nga ang nipuli niya nga si retiradong Heneral Isidro Lapeña mas maayong tawo ug mas takus nga tagdumala kay kaniya. Busa malaumon siyang nipasalig nga mas dako ang kahigayonan nga molampos sa iyang tahas si Lapeña.
** *
Pag-asumir niya sa katungdanan, gidasig ni Faeldon ang 12,000 ka importers sa pagtug-an niya kinsa’y mga opisyal sa Customs nga nangolekta og tara. Napupos na lang ang kapin sa tuig niyang pamunoan, wa’y bisan usa nga nisanong sa iyang imbitasyon.
Matud ni Faeldon napangutana sab niya ang dakong opisyal sa intelligence sa Customs nga nagtrabaho sulod na sa upat ka dekada kon duna na ba’y nadakpan ang iyang mga operatiba nga nangayo og tara. Human nahilom kadiyot, nitubag ang opisyal nga wa sila’y nadakpan, wa bisan usa.
* * *
Kon tinuod nga wa mapiski si Faeldon sa minilyon ka pesos nga tara nga gipiyestahan sa hapit tanang opisyal ug kawani sa Customs, mahimong ang mosunod maoy nahitabo:
Bisan nahibawo na ang tibuok kalibutan sa binahinay sa dakong puntil, ang mga kukhan sa Customs nisabwag og black magic nga kasamtangang nibuta ug nibungol nilang Faeldon ug iyang mga sinaligan matag Biyernes sa hapon; ug
Determinado nga naghangad sila si Faeldon ug kaubanan sa kalunsay ug kalig-on sa ilang ideyalismo mao nga nakapatuyang ang kinawatay sa ilang ubos.
* * *
Sa pormal niyang pagpuli ni Faeldon gahapon, si Lapeña niawhag sa ligdong nga mga opisyal ug kawani sa Customs pagtabang niya, nipasidaan sa mga badlungon sa paghunong na sa ilang kahiwian ug niawhag sa publiko sa pagtabang niya sa paglimpiyo sa Customs ug pagdugang sa koleksiyon alang sa nasudnong panudlanan.
Hinaot nga tinuod ang pasalig ni Faeldon nga mas maayo si Lapeña niya sa tanang aspeto sa liderato, kay may mas makinaadmanon nilang duha nga nipasidaan nga ang pagbalikbalik paghimo sa samang mga butang ug pagpaabot og lahi nga resulta maoy timaan sa pagkabuang.
* * *
- Latest
