No-fly zone sa Lapu-Lapu

CEBU, Philippines — Gideklarar nga no-fly zone ang tibuok teritoryo sa Lapu-Lapu City isip kabahin sa mga lakang sa seguridad alang sa pag-host sa ika-20 ASEAN Defense Ministers’ Meeting (ADMM) ug ika-13 ADMM-Plus gikan Oktubre 26 hangtod 30, 2026.

Sa usa ka public advisory, gipahibalo sa lokal nga panggamhanan ang pagpatuman sa maong restriksyon subay sa mga protocol sa seguridad alang sa internasyonal nga mga tigom ug sa hugot nga pagpatuman sa City Ordinance No. 16-033-A-2022.

Gikontrolar sa maong ordinansa ang paggamit sa laser lights ug pointers, laser displays ug searchlights, ingon man ang pagpalupad og tabanog, unmanned aerial vehicles (UAVs) o drones, balloon ug uban pang mga butang nga makalupad pinaagi sa remote control.

“Alang niining panahona, ang tibuok teritoryo sa Lapu-Lapu City gideklarang estrikto nga No-Fly Zone,” matod sa advisory sa city government.

Ubos sa Section 4, Paragraph 7 sa ordinansa, adunay gahom ang lokal nga panggamhanan sa pagtudlo og mga no-fly zone panahon sa mga piho nga kalihokan alang sa kaluwasan ug seguridad sa publiko.

Gipahinumdoman usab sa advisory ang mga residente nga gidili ang pagpalupad og tabanog sulod sa siyudad, sumala sa Section 12 sa ordinansa, bisan unsa pa ang matang o katuyoan sa maong kalihokan.

Gipahimangnoan usab ang mga ginikanan ug legal guardians nga ilang responsibilidad ang pagpugong sa mga menor de edad sa pagpalupad og tabanog.

Ubos sa Section 13 sa ordinansa, ang paglapas niini mahimong mosangpot sa multa nga P3,000 nga ipahamtang sa ginikanan o tigbantay sa menor de edad.

Gipasabot usab sa city government nga dili magamit ang naandan nga exemptions alang sa mga recreational drone nga motimbang og ubos sa pito ka kilo kun kini anaa sa mga lugar nga gideklarang gidili o adunay restriksyon sa paggamit sa kahanginan.

Matud sa advisory, adunay teknolohiya ang Lapu-Lapu City Police Office (LCPO) nga magamit sa pag-neutralize sa mga dili awtorisadong butang nga molupad sulod sa sakop sa maong restriksyon.

“Ang bisan unsang drone, saranggola o balloon nga makit-an nga nakalapas niini nga mga lakang sa seguridad i-neutralize ug kumpiskahon dayon,” matod sa advisory.

Gipasidan-an usab sa city government nga ang dili awtorisadong pagpalupad og mga butang sulod sa gidili o adunay restriksyon nga kahanginan adunay k multa nga P5,000, lakip ang pagkumpiska sa maong kagamitan.

Giawhag sa lokal nga panggamhanan ang mga residente ug bisita nga mosunod sa mga restriksyon samtang nangandam ang siyudad sa pagdawat sa mga delegado nga motambong sa rehiyonal nga mga tigom bahin sa depensa.

“Atong sigurohon nga ang atong pasalig sa kaayohan sa publiko ug sa nasudnong seguridad magpabiling nag-unang prayoridad atol niining internasyonal nga kalihokan,” matod sa advisory. (BANAT NEWS)