Gitago nga relasyon

Dear Tito Miguel,

Maayong adlaw, tawga lang ko og Nadine, taga Consolacion, Cebu. Usa na ka tuig na ang among relasyon sa akong boyfriend nga si Dave nga taga Mandaue City. Sa sinugdanan, abi nako’g normal ra ang tanan kay malipayon ug sweet man kaayo mi kon kami rang duha. Apan samtang nagkadugay ang among pag-uban, aduna koy usa ka butang nga dili gayud masabtan ug gasige na og samok sa akong huna-huna.

Gihangyo ug gipugos gyud ko ni Dave nga itago among relasyon sa ubang two, bisan gani sa among mga soud nga higala ug pamilya, walay nasayod nga kami na. Kada mangutana ko kaniya kon ngano ug unsa ang iyang rason, dili gyud siya mohatag og klarong tubag. Pasagdan ra ko niya nga magpabilin sa kangitngit ug maghulat sa wala.

Tito Miguel, usa na ka tuig nami nga nag-uban. Dili man sa gusto nakong ipang-hambog sa tibuok kalibutan ang among relasyon, apan gusto lang unta nako nga makagawas kami nga magkahiusa nga walay gitago. Bug-at kaayo sa dughan nga kinahanglan nakong ipahimutang ang akong kaugalingon nga mura ra gihapon kaming walay relasyon kon aduna nay ubang tawo sa among palibot.

Unsa man ang angay nakong buhaton? Mopadayon pa ba ko sa pakigbisog niining relasyona, o panahon na ba aron ipamugos nako kaniya ang tinuod aron makahimo nako og desisyon alang sa among kaugalingon? — Nadine

* * *

Nadine,

Kun dili gyud mosulti nganong kinahanglan itago inyong relasyon, duna’y pipila ka mga posibilidad. Una, tingali pribado lang gyud siya nga tawo. Apan kahibulongan kun hasta sa iyang pamilya ug inyong mga suod nga higala kay bawal itug-an. Ikaduha, basin sab wala makauyon iyang pamilya nimo. Buot pasabot dili ka niya kaya ipaglaban.

Ikatulo, basin dili ka niya ikapasigarbo. Lagmit hambugero ni siya kun kinsa ug unsa iyang tipo sa babaye, apan kalit lang nitugdong siya kanimo nga dili haom sa iyang tipo. Tabla ra nga gikauwaw ka niya. Ikaupat, lagmit nakauyab ni’g lain, kay ngano sa primero di man kinahanglan isikreto. Mahadlok siya masakpan. Mas bug-at kini nga rason aron ka mobiya, kay gawas nga gilingla ka niya, iya sab gibudhian ang iyang uyab. Buot pasabot dili siya ligdong nga tawo, igo ra ka magkonsumisyon kun magdayon mo.

Dili makatarunganon kanimo nga itago ka niya, samot na kun dili siya motug-an sa rason. Kay basin diay masabtan pa nimo ngano. Busa kani ang buhata, hatagi siya’g ultimatum, kun dili siya mopasabot kanimo ngano kinahanglan mo motago, putla na inyong relasyon. Kun tinuod ka niya nga gihigugma, mahadlok gyud na mawala ka.

Busa mapugos siya’g tug-an sa tinuod nga rason. Diha na ka manukad kun angay ba nimo siya sabton o mobiya na ka. Timan-i, kun ang relasyon sikreto, wala ka’y kalinaw ug kalipay kay mag sige ra ka’g kinto kinto. — Tito Miguel

Magpatambag ka? Ipada kang Tito Miguel: 0991-318-9366