Pag-imprinta sa ID sa PWD gipahunong sa Cebu City

CEBU, Philippines — Si Acting Mayor Raymond Alvin Garcia, nimando sa dinalian nga pagpahunong sa pag-imprenta sa bag-ong ID sa person with disability (PWD) sulod sa pito ka adlaw samtang ipahigayon ang imbestigasyon.

Gusto ni Garcia nga ipaubos sa imbestigasyon ang giingong pagpamaligya og falsified cards sa siyudad human sa gipagawas nga resolution sa city council nga nag- awhag sa buhatan sa acting mayor sa pag-imbestiga niini.

Sa nilabay nga adlaw si Konsehal James Anthony Cuenco sa iyang privilege speech nagkanayon nga niabot sa iyahang buhatan ang taho kabahin sa pagpamaligya sa mga ID sa PWDs.

Ang maong ID giingong gipamaligya gikan sa P2 mil ngadto sa P4 mil ka pesos matag usa ngadto sa mga dili PWD hinungdan nga nanawagan sila og imbestigasyon kabahin niini.

Dugang pa ni Cuenco ang bisan og walay kabilinggan sa panglawas giingong mobayad lang sila sa sakto nga kantidad ug dili kinahanglan moduso og mga dokumento makadawat na sila sa maong ID.

Ang City Council adunay ipatawag nga mga tawo aron mopaambit kalabot sa maong isyu.

Ang acting mayor gusto nga masusi dayon kini og masayod dayon sa report kalabot sa maong insidente. — BDB BANAT NEWS