Mandaue mopahigayon og Mid-year Cultural Summit
CEBU, Philippines — Ilusad sa kagamhanan sa Siyudad sa Mandaue ang nagkadaiyang kalihokan sa Mid-year Cultural Summit, 2024.
Sa maong paglusad, ang chairman sa Committee on Mid-year Cultural Summit Konsehal Cynthia Remedio nagkanayon nga ang mga kalihokan nga ilang gihan-ay ipahigayon sa Mayo 8, 2024 diin kabahin kini sa tinuig nga pangilin ni Senyor San Jose nga patron sa siyudad.
Nalakip sa gihan-ay nga mga kalihokan mao ang opening salvo sa Dahunog and Music Festival nga ipahigayon diha sa FE Zuellig Avenure sa Abril 28, 2024.
Kini pagasundan sa Abril 29, 2024 sa Mandaue Food Fair 2024 pinaagi sa pagbaligya sa mga pagkaon nga kaugalingong gigama sa mga Mandauehanon.
Ipahigayon usb sa Mayo 1, 2024 ang Cooperative Choral competition ug sundan kini sa Mayo 2, 2024 sa pagpasundayaag sa mga magtutudlo sa DepEd Night nga ipahigayon diha sa Mandaue City Cultural and Sports Complex.
Samtang sa Mayo 3, 2024 himuon usab ang Miss Palengke 2024 sa Mandaue Heritage Plaza ug pagasundan kini sa Miss Mandaue 2024 pinaagi sa pakorona sa mapili nga Miss Mandaue gikan sa 14 ka opisyal nga kandidata.
Lakip sa gihan-ay nga kalihokan ang Panagtagbo Festival nga apilan sa mga contingent gikan sa 27 ka barangay sa siyudad. (BANAT NEWS)
- Latest
