Bayranan sa kuryente mokunhod og P0.10 per kWh
CEBU, Philippines — Makasinati og P0.10 per kilowatt-hour nga pag-ubos ang mga konsumidor sa Visayan Electric alang sa bayranan nila sa buwan sa Abril ngadto sa Mayo niining tuiga.
Ug gumikan sa maong rate reduction ang bayranan sa kuryente nga P11.38 per kilowatt-hour sa niaging buwan mahimo na nga P11.28 per kilowatt-hour karong buwana.
Ang pag-ubos sa bayranan gumikan kini sa pagkunhod sa generation ug transmission charges nga natala sa power generators ug sa National Grid Corporation of the Philippines (NGCP).
Ang panimalay nga nikunsumo og 200 kWh matag buwan makadaginot kini og P20.00 sa ilang umaabot nga bayranan.
Apan bisan pa niini, gipahimagnoan gihapon sa Visayan Electric ang ilang mga konsumidor nga magbinantayon gihapon sa paggamit sa ilang kuryente ilabi na karon nga panahon sa ting-init diin mosaka usab ang pagamit sa kuryente.
“Even with the decrease in electricity rates, I urge our customers to prioritize energy conservation. During times of extreme heat like what we're experiencing now, our energy consumption tends to spike which could also cause our bill to increase significantly”, matud ni Engineer Raul Lucero, president ug COO sa Visayan Electric.
Ang Sugbo ug ang mga silingang lugar niini nakasinati og taas nga heat index ga 38°C .
Mao kini ang rason nga kasagaran sa mga tawo nakagamit gyud og aircondition.
Apan kon ang tawo magdaginot sa pagamit og kuryente makatabang kini aron malikayan ang rotational brownouts. (BANAT NEWS)
- Latest
