Sobra sa P12M kantidad sa shabu nasakmit sa kapolisan

CEBU, Philippines — Nadakpan sa mga operatiba sa City Intelligence Unit (CIU) sa Cebu City Police Office (CCPO) ang duha ka drug personalities atol sa ilang buy-bust operation diha sa Lower Sario, Barangay Bulacao, Siyudad sa Sugbo niadtong Martes sa gabii.

Nasikop sila si Jeovanie Padigos Dela Cerna, 46-anyos, residente sa Barangay Candulawan, Siyudad sa Talisay ug Franco Cortes Corominas, 44, molupyo sa Sitio Sudlon, Barangay Lahug, Siyudad sa Sugbo.

Nasakmit sa kapolisan gikan sa mga suspetsado ang 1,800 gramos nga shabu nga nagkantidad tanan ngadto sa P12.2 milyones.  Giingong ang supply nga drugas sa mga suspetsado gikan sa drug personality nga nabilanggo ngadto sa Leyte Regional Prison ug maka-dispose kini og tulo ngadto sa lima ka kilo nga shabu matag semana.

Ug ang ilang area of operation diha sa Barangay Bulacao ug mga silingang Barangay sa Dakbayan sa Sugbo.

Nasayran nga si Dela Cerna napriso na kini niadtong tuig 2017 gumikan gihapon sa pagkalambigit sa ilegal nga drugas.

Sa laing bahin, nikabat ngadto sa P512,720 ang kantidad sa shabu nga nasakmit sa kapolisan sa Lapu-Lapu City Police (LCPO) gikan sa walo ka suspetsadon sulod sa usa ka semana nila nga operasyon.

Si Police Lieutenant Colonel Christian Torres, hepe sa City Investigation Detection and Management Unit (CIDMU) ug tigpamaba sa LCPO nagkanayon nga nagsugod ang usa ka semana nilang operasyon niadtong Marso 17 hangtud sa Marso 23, 2023.

Samtang sa Dakbayan sa Mandaue, nasikop ang 45-anyos nga lalaki human sa gipahigayon nga buy-bust operation sa City Intelligence Unit sa Mandaue City Police Office uban sa pakig-alayon sa Philippine Drug Enforcement Agency diha sa may Realty Road, NRA, Barangay Subangdaku, Dakbayan sa Mandaue kagahapon sa kadlawon.

Ang nasikop mao si Christopher Giatoro, alyas  Topher , ulitawo, taga Barangay Poblacion, Dakbayan sa Talisay. Nasakmit gikan sa suspetsado ang 70 gramos nga shabu nga nibalor tanan ngadto sa P476,000 ug buy-bust money.

Giingong ang suspetsado maka-dispose og 50 gramong shabu matag semana diin ang baligyaanan niini diha sa Dakbayan sa Mandaue, Dakbayan sa Talisay ug ubang silingang mga lugar. Romeo D. Marantal, Romeo T. Limpangog,  Rowena D. Capistrano (BANAT NEWS)