Na-missing napalgan sa lungag, dugta na
CEBU, Philippines — Napalgan ang patay’ng lawas ilawom sa usa ka bangag ang lawas sa usa 50-anyos nga lalake kinsa kapin duha ka semana na nga missing diha sa Sitio Golivas, Barangay Bonbon, siyudad sa Sugbo.
Sigon ni Police Major Philip John Libres, hepe sa Malubog Police Community Precinct nga alas-10 sa buntag kagahapon dunay nitawag kanila nga nagpahibalong dunay dili masingo nga baho silang nabantayan nga nagagikan sa usa ka bangag sa maong lugar.
Gisusi sa kapulisan ang lugar ug nasuta nga aduna gyuy patay’ng lawas sa ilawom human dunay nigimaw nga tuhod sa tawo gikan sa mga gapnod sa ilawom sa lungag.
Sa pagabot sa mga sakop sa Scene of the Crime Operatives (SOCO) naugkat ang lawas.
Nasayran nga niadtong Marso 9 adunay mi-report sa kapulisan sa Malubog nga na-missing ang usa ka Ardiano Fuentes Durano, 50, taga Kiniasan, Barangay Bonbon, Cebu City. Ang nagpa-blotter sa police station human masayod nga naay nakit-an nga patay’ng lawas sa lugar miadto dayon kini sa lugar.
Samtang gihiling sa mga personnel sa SOCO ang crime scene ang anak nga lalake ni Durano maoy positibong miila sa iyahang amahan base sa gisul-ob nga t-shirt ug shorts.
Giingong sukad pa pag Marso 5 wala na nila igkita ang ilahang amahan. Dili pa makasulti ang kapulisan kung unsay gikamatyan niini, ilaha pa kining ipaubos sa autopsy aron masuta kung dunay bun-og, dinunggaban o pinusilan. -- IBM BANAT NEWS
- Latest
