22-anyos gipatay atubangan sa mga kainom
CEBU, Philippines — Patay ang usa ka 22-anyos nga lalake human kini gipusil samtang nag-inom kuyog ang mga higala niini diha sa Lower Phase 3, Kadasig, Barangay Tisa, siyudad sa Sugbo alas-8 sa gabii sa adlaw’ng Domingo, Marso 24,2024.
Ang biktima mao si John Robert Avenido Ectana, 22, residente ra usab sa naasoy nga lugar.
Base sa imbestigasyon sa Labangon Police Station sa Cebu City Police Office (CCPO) pinangulohan ni Major Eraño Regidor, ang biktima nag-inom kuyog sa iyahang mga amigo sa maong dapit dihang duha ka mga tawo ang miduol sa iyang likod.
Sa wala’y igong rason gipusil ang biktima makadaghang higayon ug naigo kini sa nagkalain-laing parte sa lawas nga miresulta sa iyang kamatayon.
Ang mga mamumuno dali sab nga misibat bitbit ang armas nga gigamit sa pagpusil sa biktima.
Kalambigitan sa illegal nga drugas ang gisubay karon nga motibo sa kapulisan kay matud pa nalambigit ang biktima ug mga mamumuno sa illegal nga drugas.
Sa pagkutlo ning maong balita padayon pa nga gipangita sa kapulisan ang mga suspek. (BANAT NEWS)
- Latest
