Suspetsadong durogista sikop sa buy-bust

CEBU, Philippines — Nasikop ang usa ka suspetsadong durugista nga gikonsiderar nga high value individual atol sa gipahigayong buy-bust operation sa Station Drug Enforcement Unit sa Inayawan Police Station kagahapon sa buntag diha sa Sitio Bayabas, Barangay Poblacion, Dakbayan sa Sugbo.

Ang suspetsado mao si Julius Recilla, hingkod ang panuigon, residente sa nahisgutang lugar.

Matud sa kapolisan nga ang suspetsado gipaubos sa duha ka semana nga surveillance monitoring ug gikatahong maka-dispose kini og 300 gramos nga shabu matag semana.

Giingong usa ka binilanggo sa city jail ang contact sa suspetsado nga maoy mo supply kaniya sa ilegal nga drugas.

Nasakmit sa mga polis gikan sa suspetsado ang mga pinutos nga ginadiling drugas nga nitimbang tanan ngadto sa kapin sa 100 gramos ug nibalor ngadto sa P681,360,00 ug usa ka kalibre .38 snub-nosed revolver nga adunay tulo ka bala.

Ang suspetsado nadetiner karon sa detention cell sa Inayawan Police Station ug gikatakdang pasakaan og kaso sa nahimo niining kalapasan. (BANAT NEWS)