24 oras nga checkpoint gihimo sa siyudad sa Talisay

CEBU, Philippines — Gisugdan na sa kapolisan sa Dakbayan sa Talisay ang pagpahigayon sa 24/7 nga revolving checkpoint sa bisan asa nga dapit sa siyudad.

Suma pa ni Police Lt. Col. Wayne Magbanua, hepe sa kapolisan sa Talisay nga adlaw ug gabii ang ilang pagpahigayon sa random checkpoint aron mapakgang ang bisan unsa nga krimen.

Dugang pa ni Magbanua nga apil sa ilang pahigayonan og checkpoint ang mga sudlonon nga dapit ug dili lang sa mga national road.

Ang mga sakop sa Special Weapons and Tactics (SWAT) ang mangulo sa matag checkpoint.

Gawas sa mga checkpoint, naa sab ang ilang mga sakop nga mopahigayon sa foot patrol diha sa mga establisamento.

Gitan-aw usab nila ang mga barangay nga sagad mahitabo ang krimen sama sa Barangay Tanke nga sa milabay nga buwan diha mahitabo ang mga pagpamusil.

Dugang pa ni Magbanua nga ang kooperasyon sa katawhan sab ang ilang gihangyo kay kung wala ang komunidad lisod para nila pagpakgang sa kriminalidad. MEL BANAT NEWS