Mga deboto naghugop sa pag-apil sa Walk with Jesus

CEBU, Philippines — Walay paglubad ang debosyon sa mga Sugbuanon ngadto kang Señor Santo Niño diin sa unang adlaw pa lang sa pagsugod sa mga relihiyosong kalihokan diha sa Basilica Minore del Santo Niño naghugop ang mga tawo nga niapil sa Penitential Walk with Jesus.

Gibana-bana sa City Disaster Risk Reduction and Management Office nga liboan ka deboto ang nikuyog sa procession sa Penitential Walk with Jesus nga gisugdan sa alas 4:00 sa kadlawon kagahapon diha sa Fuente Osmeña agi sa Osmeña Boulevard paingon sa Basilica.

Atol sa Penitential Walk with Jesus ang tibuok dalan sa Osmeña Boulevard apil ang mga sidewalk napuno sa mga deboto.

Nabantayan nga bisan pa sa pagtrabaho sa Cebu Bus Rapid Transit sa Osmeña Boulevard wala ra maglisod og subay sa dalan ang mga deboto tungod kay adunay marshals nga naggiya sa mga tawo sa ilang agian.

Pag-abot sa karo sa imahen ni Santo Niño gihimo dayon ang Santos nga Misa diin si Reverend Father Nelson Zerda ang nipahigayon niini.

Si Zerda nagkanayon nga nindot sud-ongon ug makatandog ang talan-awon samtang naglakaw diin makita ang dakong panon sa mga tawo.

Sa wali ni Zerda nagpahinumdom kini nga ang katawhan giluwas sa labaw'ng makakagahom sa mga sala nga nahimo.

Atol usab sa opening salvo mass gipaila-ila ang mga bag-ong Hermano ug Hermana niining tuiga nga mao ang magtiayong Valentino ug Ofelia San Diego.

Nunot niini, nagpasalamat si Police Colonel Ireneo Dalogdog, direktor sa Cebu City Police Office sa mga deboto nga nisanong sa ilang hangyo aron malinawon ug hapsay nga mapahigayon ang kalihokan sa Fiesta Señor.

Nasayran nga 1,335 ka personnel gikan sa Philippine National Police, Armed Forces of the Philippines, Philippine Coast Guard, Bureau of Fire Protection ug force multipliers ang nagbantay sa kalihokan kagahapon.

Laing 141 ka police personnel ang gi-assign aron magbantay diha sa Basilica Minore del Santo Niño. (BANAT NEWS)