Rama nangumusta bahin sa Oro Sugbu robbery
CEBU, Philippines — Nangumusta karon si Cebu City Mayor Michael Rama sa Cebu City Police Office may kalabutan sa ilang imbestigasyon sa Oro Sugbo Pawnshop and Jewelry Store robbery niadtong bulan sa Disyembre sa miaging tuig.
Matud pa sa mayor sobra buwan na human nahitabo ang tulis apan hangtud karon wala pa mabawi ang gipangkawat nga mga alahas, bisan og duna nay mga suspek nga nadakpan ug nakasohan.
Gusto sa mayor nga makit-an ang mga alahas ug ipresentar gayud kini tungod kay hangtud karon wala pa siya nakadawat og impormasyon bahin niini.
Ang Cebu City Police Office nakasikop og unom ka mga suspetsado sa giingong tulis lakip na ang giingon mastermind na si Jigger Geverola, apan ang naulahi gipabuhian sa piskalya tungod sa kahuyang sa kaso batok kaniya.
Gipadayag sa mayor ang pagka dismiss ni Geverola nagpakita nga kinahanglang mohimo pa og daghang mga pamaagi ang CCPO aron masulbad ang maong kaso.
Gusto ni Rama nga mo-update kaniya ang kadagkuan sa kapulisan bahin sa ilang mga imbestigasyon sa tanang mga krimen ug kasong wala pa nasulbad hangtud karon.
Ang Mayor nitug-an nga maningil gayud siya kay maoy trabaho sa polis tungod kay silang mga mayor apil sa paninglan sa katawhan may labut sa peace and order sa ilang hurisdiksyon. IBM, BANAT NEWS
- Latest