Graduating nursing student nangawat, gipadakop sa higala

CEBU, Philippines —  Gipadakop sa iyang higala ang usa ka graduating nga nursing student human siya nasakpan nga miunay sa pagkawat sa tinigom nga kwarta diha sa giabangan niini nga lawak sa Champaka Compound, Purok Sequa, Barangay Dumlog, Dakbayan sa Talisay niadtong Miyerkules sa gabii.

Ang biktima nga tinun-an sa Talisay City College dali nga nisumbong sa kapolisan human nawagtang ang iyang tinigom nga moabot sa P27 mil.

Sa inisyal nga imbestigasyon sa kapolisan nasuta nga makapila na kini ka higayon nga nawagtangan og kwarta ang biktima diha sa iyang lawak apan wala siya nahibalo kun kinsa.

Hinungdan nga siya sekreto kini nga nagbutang og CCTV camera sa iyang lawak. Tuod man pinaagi sa maong gadget naaktohan gyud ang pagpangawat sa iyang tinagoang kwarta.

Ang suspek nga giila mismo sa biktima nga iyang bestfriend nga  22- anyos nga tinun-an sa nursing nga taga Barangay Mohon sa nahisgutang siyudad.

Niadtong Miyerkules, nibisita ang suspek sa biktima apan ang naulahi nananghid nga moadto og eskuylahan mao nga gibilin niya ang suspek sa lawak sama sa naandan nilang buhaton.

Apan sa pagbalik na sa biktima nadiskubrehan niyang gikuhaan ang iyang tinagoang kwarta diha sa iyang sininaan, P5 mil nalang ang nabilin.

Dalidali niyang gisusi ang gimuntar nga CCTV ug didto iyang nakita ang iyahang bestfriend nga miutingkay sa iyang mga gamit ug sinina hinungdan sa iyang pagduda nga kini maoy nagkuha sa kwarta.

Tungod niini, misumbong siya sa kapolisan hinungdan nga gipangita ang suspek hangtud nga nadakpan  diha sa usa ka imnanan kauban ang iyang mga barkada.

Apan sa dihang  gipangitaan kini sa kwarta, kini mibutyag nga nahurot na kay iyaha ng gibayad sa iyang tuition .

Tungod niini, gibalhug ang suspek sa karsel ug gikatakdang pasakaan og kasong pagpangawat. — IBM (BANATNEWS)