Napulo ka kawani sa CCTO positibo sa drug test
CEBU, Philippines — Napulo ka kawani sa Cebu City Transportation Office ang giingong nagpositibo sa kinalit nga drug test nga gipahigayon sa nilabay’ng semana.
Nasayran nga kapin sa 600 ka trabahante sa CCTO ang gipaubos sa kinalit nga drug test sa Cebu City Office on Substance Abuse Prevention (COSAP) nga gipangulohan ni Jonah John Rodriguez.
Matud ni Raquel Arce, pangulo sa CCTO nga nagpaabot pa siya sa official report nga ihatag gikan sa buhatan sa COSAP tungod kay initial palang ang iyang nadawat.
Ug base sa iyang pasiuna nga kasayoran casual ug job order ang maong mga nagpositibo apan wala pa kini niya mahinabi gumikan kay wala pa ang opisyal nga report gikan sa COSAP.
Si Arce nagkanayon nga pinaagi sa maong report iyaha unya nga masayran kong adunay wala motambong sa maong drug test nga gipahigayon.
Si Arce nipadayag nga gusto niya nga mawala o matangtang sa trabaho ang mga nagpositibo apan kinahanglang mapaabot siya sa desisyon sa mayor sa silot nga ipahamtang sa maong mga empleyado.
Si Arce nibutyag nga adunay nagpositibo sa mga kawani nga gipaubos sa drug test bisan og wala pa ang final report. (BANAT NEWS)
- Latest
