Nagplano sa tulis, napalpak

CEBU, Philippines —  Lalaking maoy nagplano nga tulison ang iyang mga kababayan nga negosyante gikan sa General Santos City, nasakpan human nasipyat og tubag sa mga polis hinungdan sa pagkasikop sab sa iyang mga kakunsabong tulisan nga taga Lapu-Lapu City niadtong adlaw nga Lunes.

Ang biktima mao ang mga mag-partner nga 23 ug 33 anyos nga taga Purok Golden Valle, Barangay San Isidro, General Santos City kansang mga pangalan di gustong ipabutyag.

Ang mga naghimo sa krimen mao sila si Jay Palermo, 31, taga Dimatago Village; Jerry Apa, 28,taga Barangay Mactan ug Leopoldo Jamolin, 37, taga Barangay Pajo nga pulos sakop sa Dakbayan sa Lapu-Lapu.

Sa report sa Cebu City Police Office (CCPO) ang mag-partner nga negosyante  gikatahong nangari sa Sugbu kay bayran ang napalit nga second hand nga sakyanan nga gi-deal kanila sa ilang kababayan nga si Palermo.

Matud pa sa mga biktima, nakapadala na sila og P70 mil kang Palermo aron pang downpayment sa sakyanan. Apan wala kini gibayad ni Palermo kay iyaha kining nagasto. 

Nisamot iyang suliran sa dihang ang mga biktima mipahibalo nga ilaha nang kuhaon ang sakyanan ug anha na bayaran ang kinatibuk-ang bayad ini og abot nila sa Sugbu kun makuha na nila ang ilang gipalit.

Sumala pa sa kapolisan, giplano nalang ni Palermo nga tulison ang duha kauban sa mga higala nga silang Apa ug Jamolin.

Sa ilang plano, gikan sa airport kuhaon ni Palermo sa iyang sakyanan ang duha aron dad-on ngadto sa nagbaligya sa sakyanan. Apan ini og abot sa Mandaue City adto sila tulison nilang Apa ug Jamilon nga nagsakay og motorsiklo.

Apan napalpak ang plano tungod kay wala makaapas silang Apa ug Jamolin sa sakyanan nilang Palermo maong miapas nalang sila.

Pagabot sa awaaw nga dapit sa Barangay Binaliw didto gikatahong mi-overtake ang duha ug gibabagan sa motorsiklo ang sakyanan ug gitulis ang mga biktima.

Sumala pa sa kapolisan, gitutokan og armas ang mga biktima ug gisakiyo ang mga alahas ug kwarta nga moabot P700 mil  ug pagkahuman dali-daling misibat.

Ang mga biktima ug si Palermo miadto sa Talamban Police Station aron magpakitabang. Apan gikatahong sa pagsukit-sukit sa mga polis kang Palermo nasipyat kini og sa pagtubag hinunhgdan nga mas gikuti-kuti kini’g pangutana.

Paglabay sa pipila ka minutos mitug-an kini sa tinuod ug kabahin sa ilang plano. Mibutyag sab siya kun kinsa iyang mga kasabot sa paghimo sa maong krimen.

Sa follow-up operations sa kapolisan didto sa Sitio San Roque, Barangay Mactan sa Lapu-Lapu City naabtan sila si Jamolin ug Apa.

Nabawi sa kapulisan ang mga alahas, apil na sab ang kalibre .380 nga armas nga gigamit ni Jamolin pagtion sa mga biktima apan P170 mil nalang ang kwarta nga nabawi.

Si Apa, kinsa maoy nagkupot sa kwarta matud pa sa kapolisan, miingon nga human sa krimen gigasto dayon niya ang kwarta sa inom, bayad sa babaye ug nanghatag sab siya og kwarta sa mga silingan.

"Unsa may gamit sa kwarta diay? atong ilingaw, sky is the limit.. Ako (naggastp), chicks ta, inom... Bunot kay bunot ra man ko," sigon ni Apa.

Si Jamolin sa iyang bahin miingon nga si Palermo maoy nagplano nga tulison ang mga biktima nga matud pa niini mga “scammers” sa General Santos City, butang nga kusganong gihimakak sa mga biktima.

Si Palermo sa pikas bahin naghilak nga nangayo og pasaylo sa mga biktima ug mihangyo nga hatagan siya og usa ka chance kay duna siya'y duha ka buwan pa nga anak.

Matud pa nga gipasaylo sa mga biktima si Palermo, apan desidido silang ipadayon ang pagpasaka og kaso batok kaniya ug sa mga kaubanan niini. IBM (BANATNEWS)