Nanulis, nipatay nadakpan

CEBU, Philippines —  Sulod lang sa usa ka oras nadakpan dayon sa kapulisan sa Abellana Police Station 2 ang suspek nga miunay og tulis ug pagkahuman midunggab hangtud napatay ang babayeng kauban niini sa trabaho diha sa 0692 Don Gil Garcia Street, Barangay Capitol Site sa Dakbayan sa Sugbo niadtong Biyernes sa hapon.

Ang suspek nga giila sa kanhi kauban sa trabaho mao si Kino Bacardo Aying, 25, taga Talima, Isla sa Olango, Dakbayan sa Lapu-Lapu usa ka food delivery rider samtang ang biktima mao si Zenny Dondoyano Bazarte, 40,  lumad nga taga Cansabusab, Poro, Isla sa Camotes apan temporaryong nagpuyo sa Barangay Capitol Site.

Nasuta sa imbestigasyon sa Abellana Police Station 2 nga ang biktima maoy tigdawat sa bayad sa paluwagan nila sa mga kauban sa iyang gitrabahoan nga tindahan og pizza.

Ang suspek dili na trabahante sa maong tindahan og pizza atol sa pagkahitabo. Giingong giadto niini ang biktima sa gipuy-ang apartment ug gitulis.

Gituohang nagdumili ang biktima mao nga gidunggab kini sa suspek sa nagkadaiyang parte sa lawas.  Pagkahuman gikuha dayon sa suspek ang koleksyon sa paluwagan nga kwarta nga nagkantidad og P197,054 ug dayon misibat.

Nahitabo ang insidente pasado alas 2 sa hapon apan na-report kini sa kapulisan pagka alas 3 na sa hapon.

Dihang niadto ang kapulisan sa nahitaboan wala na didto ang biktima kay gidala na kini ngadto sa tambalanan apan nasuta nga nakabsan gyud kini sa kinabuhi.  Malas lang ang suspek kay dunay nakakita ug nakamay-ong kaniya nga maoy mihatag og deskripsyon ngadto sa kapuyo sa biktima nga nagtrabaho sab sa maong pizza house.

Matud pa taason nga lalake, niwang ug taas og suwang  ang tawong nitulis ug nipatay sa biktima. Pagkasayod sa kapuyo sa biktima sa deskripsyon nagduda na kini nga ang suspek nga kaniadto ilang kauban sa trabaho ang gitumbok sa testigo.

Base sa maong deskripsyon ug impormasyon nga nahipos sa kapolisan gilusad dayon ang manhunt operation batok sa suspek, paglanat og sobra usa ka oras nadakpan kini sa Barangay Sambag 2.

Na-recover sa kapulisan ang kutsilyo nga gituohang maoy gigamit sa suspek pagdunggab sa biktima.

Matud pa nga tungod kay kaniadto nagtrabaho man sa maong pizza house ang suspek, nakahibalo kini nga ang biktima maoy nagtip-ig sap undo sa paluwagan sa mga trabahante. (BANAT NEWS)