Duha nasikop sa checkpoint

CEBU, Philippines — Duha ka mga lalaki ang gidakop sa kapolisan sa Comelec/Police Checkpoint sa Barangay Lamacan sa Lungsod sa Sibonga kagahapon sa kaadlawon ug gidudahan nga silang duha apil sa pagtulis sa Oro Sugbu Pawnshop sa dalan Colon sa Cebu City.

Una niini, gikonsiderar lang nga mga persons of interest (POI) ang drayber nga si Dann Carlo Geverola Flores, 23, ug sakay niyang si Jordan Ramos Baquiano, 29 , parehong taga Brgy. Gutlang, Argao.

Si Baquiano nasuta nga adunay pending warrant of arrest sa kasong murder.

Human sa pagkahitabo niadtong Sabado, ang Cebu City Police Office ug Cebu Police Provincial Office nagtinabangay dayon sa pagpangita sa gibanabanang lima ka armadong lalaki nga maoy nitulis sa maong pawnshop.

Ang duha luwan usa ka awto nga 2007 Honda Civic, Habanero Red adunay ‘for registration’ nga plaka nga kaparehas sa gisakyan sa gidudahang tulisan human sa pagtulis sa Oro Sugbu.

Sumala pa sa report, samtang nagpahigayon og checkpoint ang kapulisan nabantayan nila ang maong awto apan sa dihang ilaha kining gipara, gikatahong milahos kini ug gibanggaan ang Comelec Checkpoint signage ug misuway og ikyas.

Maayo nalang nga dunay patrolcar sa unahan nga nagbantay ng daan sa sitwasyon ug dali nga nakaabante aron babagan ang awto.

Dihadiha gimandoan ang mga sakay sa pagkanaog. Pinaagi sa pagabag ni Brgy. Kapitan Severino Cabrera Jr. nga nibarog isip testigo sa search, nakita didto ang mga armas.

Ang nakuha naglakip sa usa ka KG9 sub machine pistol nga dunay mga bala; usa ka kalibre .45 pistol nga dunay mga bala; usa ka granada; usa ka rifle grenade; usa ka light blue sweatshirt; usa ka black sweatshirt; usa ka black jacket; ug tulo ka ballcap.

“Ma-consider nato silang Persons of Interest nganong sila man ang naggamit sa maong sakyanan nga diin ang maong sakyanan maoy gigamit sa mismong akto nga pagpang hold-up…For questioning makita namo nga naa sila’y partisipasyon, makita namo didto involvement sa mao nga robbery incident,” sigon ni Police Colonel Ireneo Dalogdog, City Director sa Cebu City Police Office.

Dako ang pagduda sa kapolisan nga kauban ni sila sa grupong nanulis sa maong pawnshop apil na kadtong duha ka POIs nga gidakop sa MCPO.

Matud sab sa CCPO dunay susamang modus nga nahitabo sa Cagayan De Oro City. Gipalawman karon ang imbestigasyon kun  lokal o dayo ang grupong mitira sa maong pawnshop.

Gisusi na sab sa kapulisan ang background sa security guard nga nagbantay sa pawnshop apil na sab ang mga security guards sa mga kasikbit nga mga tindahan kay wala gisalikway ang posibilidad nga kakunsabo sab sila.

Ang CCPO makigtagbo sa mga security agencies aron mga gwardiya sa mga establisemento adunay direct contact sa mga police stations diin sakop ilang gibantayang establisamento.

Giawhag sab sa kapulisan sa mga balay patigayon paginstalar og alarm gadgets nga konektado sa kapulisan aron makaresponde dayon.

POIs sa Mandaue City

Sa Mandaue City,   granada, upat  ka magazine  sa M16,  handheld radios ug uniporme sa  polis ang nasakmit gikan sa managkapuyo nga gikonsiderar sab kapolisan nga mga persons of interest sa pagtulis sa Oro Sugbu Pawnshop sa  dalan Colon sa Siyudad sa Sugbo niadtong Sabado sa buntag.

Gialarma sa kapolisan sa Presinto 3 sa Mandaue City Police Office (MCPO) ang armado sa Barangay Labogon sa Siyudad sa Mandaue nga posibleng kauban kini sa mga nanulis sa Oro  Sugbo.

Si Police Lieutenant Colonel Franc Rudolf Oriol, deputy chief for administration ug tigpamaba sa MCPO miingon nga ang duha mao ang managkapuyo nga sila si Norman Lopez  Manuel, 41, ug Marcelyn Socor, 29, nagpuyo sa maong barangay.

Giklaro ni Oriol nga ang duha unang giimbetar alang sa dugang pakisusi labot sa nahitabong tulis sa pawnshop dalan Colon.

Apan nakita sa kapolisan sa ilang gipuy-an ang kalibre .45 nga armas nga adunay upat ka bala, granada, upat  ka magazines  sa Armalite o M16 rifle, T-shirt nga green  nga adunay nakaprintang  Polis, mga IDs ug upat ka mga handheld radios.

Ang operasyon gihimo sa kapolisan sa Presinto 3 ug mga sakop sa City Intelligence Unit sa MCPO, ug Cebu City Police Office.

Gipasabot ni Oriol nga ang managkapuyo gidakop dili tungod sa ilang kalambigitan sa pagpanulis sa pawnshop kondili sa nakuhang granada ug uban pang ilegal.  Apan si Manuel kusganong mihimakak og kalambigitan sa maong pagpanulis apan gikatahong miangkon nga siya kanhi sakop sa New People’s Army nga nagbase sa Davao Oriental. (BANAT NEWS)