Mga drug den gibungkag, 7 sikop sa managlahing operation

CEBU, Philippines — Nadakpan sa buy-bust operation sa PDEA-7, Regional Intelligence Unit-7 ug Cebu City Police Station 6 ang tulo ka illegalista ug giguba sab ang drug den diha sa Abellana /Street, Barangay Suba, Siyudad sa Sugbo pasado alas 11 kagahapon sa buntag.

Ang subject sa buy-bust operation ug tigmentinar sa drug den mao si Stephen Navarro alyas Tepen, 32 anyos, wala'y trabaho.

Sikop sab ang duha ka tigbisitahan sa drug den nga si Adonis Ubaldo Jimenez, 60 anyos ug Rudolf Exor Davirao, 49 anyos, ang duha pulos habal-habal driver ug residente sa Barangay Bakilid, dakbayan sa Mandaue.

Nakompiskar sa mga operatiba ang walo ka putos sa gituohang shabu nga niabot og 10 gramos ug mobalor og P68,000, buy-bust money, kwarta nga P250 nga gituohang halin sa drug den ug mga drug paraphernalia.

Ang dinakpan makabaligya og 10 gramos sa shabu kada semana ug magpabayad og P20 ngadto sa P30 kada tawo sa mogamit sulod sa drug den.

Sa laing operasyon nasikop sa PDEA Negros Oriental Provincial Office atol sa buy-bust sa Purok Ipil, Barangay Tubtubon, Sibulan, Probinsya sa Negros Oriental sila si Raynen Ablay, 49 anyos, wala'y trabaho samtang nakaikyas ang kauban niini nga si Terence George Ablay.

Nadakpan sab si Jesse Ian Deciar, 44 anyos, job order employee sa usa ka ahensiya sa gobyerno, tigbisitahan sa drug den nga giguba sa PDEA.

Nakompiskar sa mga operatiba ang unom ka putos sa gituohang shabu nga motimbang og 16 gramos ug mobalor og P108,800, buy-bust money ug mga drug paraphernalia.

Nasuta nga maka dispose og 10 gramos kada semana ang dinakpan ug magpabayad kini og P50 kada tawo sa mogamit sulod sa drug den.

Samtang magtiayon nga pusher ang nasikop usab sa buy bust operation sa kapolisan sa dakbayan sa Lapu-Lapu niadtong Biyernes sa gabii diha sa barangay Marigondon.

Si Police Captain Abraham Igot sa Presinto 4 sa Lapu-Lapu City Police Office (LCPO) maoy nangulo sa operasyon.

Ang mga nasikop mao sila si Roy, 27 anyos ug Mona, 28 anyos nga molopyo sa Barangay Marigondon sa maong dakbayan ug una pang higayon nga nadakpan.

Nasakmit gikan sa ilang posisyon ang 75 gramo nga shabu nga nagkantidad og P510,000.00. — /MEL (BANAT NEWS)