Alert level 4 giisa ngadto sa Gaza, mandatory repatriation gimando

CEBU, Philippines — Ang Department of Foreign Affairs mimando na sa mandatory repatriation and evacuation sa tanang mga Filipino nga naipit karon sa giyera didto sa Gaza  sa Israel human ang militar sa maong nasud mianunsyo nga molusad sila og opensiba sa teritoryo sa Palestine gikan sa yuta, kahanginan ug sa dagat.

Kagahapong adlawa, ang DFA mideklarar og Alert Level 4 sa Gaza strip —  mao kini ang kinatas-ang crisis alert level — nga nagpahibalo sa tanang mga Filipino nga kinahanglan na gyud nilang mobiya sa kung asa sila karon sa Gaza.

Si DFA Undersecretary Eduardo de Vega miklaro hinuon nga bisan tuod og mandatory na ang pagpapauli sa mga Filipinos dili sila pisikal nga kuhaon gikan sa ilang mga gipuy-an karon.

“But we are telling you to leave. And if you choose to stay behind, we can’t stop you, we cannot prevent it," matud pang De Vega sa interbyu kaniya sa Radyo 630.

Niadtong adlaw nga Biyernes, gipahibalo ni De Vega nga 92 sa 131 ka Filipino nga naa sa Gaza ang mihangyo nga mamauli sa nasud, apan dako kaayo hagit sa mga opisyales didto kung asa sila pwedeng moagi aron makagawas sa Gaza tungod kay kini gibabagan man sa Israel.

Ang Pilipinas ug ubang mga kanasuran nagpaabot nga mohatag ang Israel og agianan o humanitarian corridor para niadtong mga naipit sa Gaza aron makagawas didto padung sa ilang nasud o ba kaha sa silingang nasud sa Egypt.

Tulo n aka mga Pilipino ang nakalas human sa pagatake sa Hamas, usa kanila caregiver nga taga Negros Occidental kansang mga kabanay nagtuo nga nagdumili kini sa pagbiya aron protektahan ang iyang giatimang masakitong agalon matud pa sa DFA.

Base sa uwahing report gikan sa mga kadagkoan sa Gaza, moabot na og 1,900 ka Palestinians, 610 niini mga bata, ang nakalas sa pagbawos sa Israel pinaagi sa air strikes pipila ka oras human giatake sa Hamas ang mga pinuy-anan sa mga Israelis sa utlanan sa Gaza ug Israel sa miaging semana.

Human sa pagatake sa Hamas, mideklarar og giyera ang Israel ug mipaulan dayon mga bomba sa nagkalain-laing targets sa sud sa Gaza, apil sa gitirahan ang mga buildings nga nahimutangan sa nagkalain-laing mga media companies nga nag-monitor sa kagubot sa maong rehiyon.

Ang United Nations ug uban pang mga nasud nanawagan sa Israel nga hunongon una ang pagatake tungod sa naipit nga 1.1 milyon nga Gazans nga wala kapaingnan karon. — /IBM (BANAT NEWS)