10 ka balay nga nahimutang sa Estero de Parian gub-on karon
CEBU, Philippines — Ipahigayon sa Task Force Gubat sa Baha karong adlawa ang pagpanguba sa 10 ka panimalay nga gipuy-an sa napulo ka pamilya nga nahimutang diha sa sapa sa tumoy nga bahin sa Estero de Parian dapit sa pier area nga sakop sa Barangay San Roque, Dakbayan sa Sugbo.
Nasuta sa Task Force Gubat sa Baha atol sa ilang tigom nga napulo lang ka pamilya ang palalinon ug dili ang 12 nga maoy unang gikataho.
Matud ni Joseph Ylaya sa Division of the Welfare for the Urban Poor (DWUP) atol sa tigom nila sa TFGSB sugdan na sa pagpangguba ang mga panimalay karong adlaw nga gipuy-an sa mga pamilya nga gipapahawa tungod kay anaa nahimutang sa danger zone.
Si Ylaya nagkanayon nga aduna na sila’y mga coordination meeting uban sa mga pamilya ug sa mga nagkadaiyang buhatan sama sa DWUP, PROBE, kapitan sa Barangay San Roque, City Legal Office, DSWS, CCRRMO,DEPW, Police Station 3, DGS, DPS, DepEd Cebu City ug school’s division superintendent sa mga nangalabay nga adlaw.
Dugang ni Ylaya nga ang mga apektado nga pamilya kasamtangan usa sila nga ipahimutang sa roof top sa barangay hall sa San Roque hangtud nga makatukod na sila sa ilang permamente na unya nga kapuy-an diha sa Nangkaville sa Barangay Quiot Pardo niining siyudad. (BANAT NEWS)
- Latest