CCPO naninguha nga magpabiling green category ang Cebu City
CEBU, Philippines — Paningkamutan sa Cebu City Police Office (CCPO) nga magpabilin ang green category sa Siyudad sa Sugbo diin pasabot niini walay security concerns sa Barangay ug Sangguniang Kabataan elections karong Oktubre 30, 2023.
Si Police Lieutenant Colonel Albert Reeves Quilitorio sa CCPO nagkanayon nga ang Cebu City anaa sa green category apan matud niini nga wala nila gisalikway ang posibilidad nga adunay krimen nga motumaw hinungdan nga subsob ang ilang pagpangandam.
“Mao na atong i-maintain nato na nga green lang gihapon”, ni Quilitorio pa.
Gipadayag ni Quilitorio nga ang Cebu City Police Office andam na sa BSKE.
“Tanan natong tawo i-deploy, naa na tay mga lecture, prepare na kami tanan sa umaabot nga election”, matud ni Quilitorio.
Ang tanang personnel sa CCPO ang ipakatap sa adlaw na gyud sa piniliay aron masiguro nga hapsay, malinawon ug malampuson nga mapahigayon ang eleksiyon.
Kanunay usab nga magtagbo ang CCPO ingon man ang Comelec Cebu City isip kabahin sa pagpangandam aron mahibaw-an angaya pa nga tutokan ug hatagan og patagad sa ilang pagpangandam sa nagkaduol nga BSKE. (BANAT NEWS)
- Latest
